তোমাৰ ভিতৰত তোমাক লুকুওৱা

 তোমাৰ ভিতৰত তোমাক লুকুওৱা

---------------------------------------------

মূল : মহাদেৱ সাহা (বাংলা)

অসমীয়া অনুবাদ : কুমুদ ঘোষ

------------------------------------------

মানুহ, এই সময়ত তুমি শুদ্ধ হোৱা, ভূমিলৈকে নত

হোৱা

ভিতৰলৈ চোৱা, ভিতৰৰ 'মই'ক চোৱা, স্থিৰ হোৱা

মাটিৰ মানুহ ইমান ওপৰলৈ নাযাবা;

এই সময়ত সামৰি-সুতৰি লোৱা শৰীৰ, এই সময়ত শুই থাকা

টোপনিৰ ভিতৰত নিঃশব্দে টোপনি যোৱা,

একোৱেই নাচাবা, ধৰিবলৈ নাযাবা,

গভীৰ পানীৰ নিদ্ৰিত মাছৰ দৰে ডুবি থাকা;

সকলো দাগ মচি পেলোৱা, সকলো শব্দ পাহৰি পেলোৱা,

গুছি যোৱা শব্দহীন নৈঃশব্দলৈ, নিৰ্জনতালৈ,

নিজৰ ভিতৰলৈ;

নাচাবা, নুচুবা, নুশুঙিবা,

জিৰাফৰ দৰে উলিয়াই নিদিবা জিভা

তোমাৰ ভিতৰত তোমাক লুকুওৱা;

অস্থিৰ আঙুলিবোৰ সম্বৰণ কৰা,

শান্ত হোৱা, শুচি হোৱা, সমাধিত হোৱা;

মানুহ, তুমি বৰ ক্লান্ত হৈছা, বৰ ক্লান্ত হৈছা,

অলপমান ৰোৱা, বহা, স্থিৰ হোৱা ।

-------------------------------

মহাদেৱ সাহা বাংলাদেশৰ স্বাধীনতাৰ পৰৱৰ্তীকালৰ এজন অন্যতম প্ৰধান কবি । ৰোমাণ্টিক গীতি-কবিতাৰ বাবে জনপ্ৰিয় এইজনা কবি জীৱিকাসূত্ৰে এসময়ত সংবাদ সেৱাৰ সৈতে জড়িত আছিল । বাংলা একাডেমি পুৰস্কাৰ, একুশে পদক, আলাওল সাহিত্য পুৰস্কাৰ আদিৰে কবি বিভূষিত । অনুবাদ আয়োজনৰ অনুমতি সংগ্ৰহত সহায় কৰাৰ বাবে বন্ধু ৰাহাত ৰাব্বানীৰ প্ৰতি অনুবাদক কৃতজ্ঞ ।