যুগল কবিতা

 যুগল কবিতা

-----------

মূল : মহাদেৱ সাহা (বাংলা)

অসমীয়া অনুবাদ : কুমুদ ঘোষ

-----------------------------------------

তুমি যদি নদী হোৱা, মই হওঁ এই শুকান বালি

মই হওঁ মৰুভূমি, তুমি তাৰ সেউজীয়া পত্ৰলেখা;

 

তুমি যদি মেঘ হোৱা, মই হওঁ চ'তৰ খৰাং

তুমি কোনো গান হ'লে, মই সেই গানৰ অন্তৰা;

 

তুমি যদি ৰাতি হোৱা, মই হওঁ বিষণ্ণ দুপৰীয়া

তুমি নৃত্যকলা হ'লে, মই হওঁ ভৰিৰ নূপুৰ;

 

তুমি যদি বৰ্ষা হোৱা, মই হওঁ বৰ্ষাৰ ময়ূৰৰ মাত

তুমি স্ৰোতশ্বিনী হ'লে, মই হওঁ দূৰৈৰ তটৰেখা ।

 

তুমি যদি বন হোৱা, মই হওঁ তাৰ সৰাপাত

তুমি বৰ্ণমালা হ'লে মই হওঁ শুকুলা শূন্য বহী;

 

তুমি পৰ্যটক হ'লে, মই হওঁ ভৰিৰ তলৰ ঘাঁহ

তুমি সৰোবৰ হ'লে, মই সেই সৰোবৰৰ হাঁহ;

 

তুমি যদি বৃক্ষ হোৱা, মই হওঁ মাত্ৰ তাৰ ফল

তুমি দুটি চকু হ'লে, মই হওঁ তাতে চকুপানী ।

-------------------------------

মহাদেৱ সাহা বাংলাদেশৰ স্বাধীনতাৰ পৰৱৰ্তীকালৰ এজন অন্যতম প্ৰধান কবি । ৰোমাণ্টিক গীতি-কবিতাৰ বাবে জনপ্ৰিয় এইজনা কবি জীৱিকাসূত্ৰে এসময়ত সংবাদ সেৱাৰ সৈতে জড়িত আছিল । বাংলা একাডেমি পুৰস্কাৰ, একুশে পদক, আলাওল সাহিত্য পুৰস্কাৰ আদিৰে কবি বিভূষিত । অনুবাদ আয়োজনৰ অনুমতি সংগ্ৰহত সহায় কৰাৰ বাবে বন্ধু ৰাহাত ৰাব্বানীৰ প্ৰতি অনুবাদক কৃতজ্ঞ ।