ইমান যে সুখৰ নৃত্য, ইমান যে দুঃখৰ অশ্ৰু
-----------
মূল
: মহাদেৱ সাহা (বাংলা)
অসমীয়া
অনুবাদ : কুমুদ ঘোষ
-----------------------------------------
ইমান
যে সুখৰ নৃত্য, ইমান যে দুঃখৰ অশ্ৰু
ইমান স্বপ্ন বেদনাৰ চিম্ফনি
ইমান যে দিন-ৰাতিৰ চিত্ৰনাট্য,
মিলন, বিচ্ছেদ, ভাঁহি যোৱাৰ বিৱৰণ
শীত, গ্ৰীষ্ম, বৰ্ষাৰ ৰোমাঞ্চ,
সেই প্ৰথম প্ৰণয় শিহৰণ, বিৰহৰ
বাঁহী ।
কত যে হেৰাই যোৱা মুখৰ ৰেখাচিত্ৰ,
কত যে
এৰি অহা বনৰ বৃত্তান্ত
মেঘ, বৰষুণ, বিষাদৰ ছাঁ,
নক্ষত্ৰৰ অস্থিৰ চকু
ছাঁ-পোহৰৰ নৃত্যকলা, পখীৰ পদশব্দ
কত মচ্ খোৱা আঙুলিৰ ছাপ, কত বিবৰ্ণ
হস্তলিপি ।
কত বাট হেৰুওৱা বাটৰুৱাৰ ন'টবুক
কত ছিঙা তাঁৰৰ দীৰ্ঘশ্বাস
গোলাপৰ গোপন অশ্ৰুবিন্দু, মাঘৰ
গভীৰ নিশাৰ
বিষণ্ণ নিয়ৰ
কত সুখ-দুঃখ, বেদনাৰ নিঃশব্দ
সঙ্গীত ।
-------------------------------
মহাদেৱ সাহা বাংলাদেশৰ স্বাধীনতাৰ পৰৱৰ্তীকালৰ এজন অন্যতম প্ৰধান কবি । ৰোমাণ্টিক গীতি-কবিতাৰ বাবে জনপ্ৰিয় এইজনা কবি জীৱিকাসূত্ৰে এসময়ত সংবাদ সেৱাৰ সৈতে জড়িত আছিল । বাংলা একাডেমি পুৰস্কাৰ, একুশে পদক, আলাওল সাহিত্য পুৰস্কাৰ আদিৰে কবি বিভূষিত । অনুবাদ আয়োজনৰ অনুমতি সংগ্ৰহত সহায় কৰাৰ বাবে বন্ধু ৰাহাত ৰাব্বানীৰ প্ৰতি অনুবাদক কৃতজ্ঞ ।
No comments:
Post a Comment