অপৰাধ
--------
মূল : অংশুমান কৰ (বাংলা)
অসমীয়া অনুবাদ : কুমুদ ঘোষ
--------------------------------------
ল'ৰালিতে চঞ্চল পৰুৱা এটাক
বিনা দোষত মাৰি পেলোৱাৰ অপৰাধত
যুৱক এজনে নিজকে আজিয়ো দোষী বুলি অনুভৱ কৰে ।
সন্ধিয়াৰ আকাশত ডাৱৰে যেতিয়া ঢাকি ধৰিছিল তৰা
তেতিয়া যাৰ কাষেদি তেওঁ এদিন খোজ দিছিল
আজি তেওঁৰ পৰা শত যোজন দূৰৈত থকাৰ বাবে
এজন প্ৰৌঢ়ই নিজকে অপৰাধী বোধ কৰে ।
বকফুলৰ ফুলৰী খাব বিচাৰিছিল যিজন তৰুণে
তেওঁক বকফুলৰ ফুলৰী ভাজি দিব নোৱাৰিলে বুলি
আজিয়ো অনুশোচনাত দগ্ধ হয় এগৰাকী বৃদ্ধা ।
কত কাৰণত যে মানুহে নিজকে
অপৰাধী বোধ কৰে সংসাৰত, সভ্যতাত ।
কেৱে কোনোদিনেই ভাবিব নোৱাৰা
এনে এটা দিনো আহিব, যিদিনা
কেৱল জীয়াই আছে বুলিয়েই
কোনো কোনোৱে নিজকে অপৰাধী বোধ কৰিব ।
No comments:
Post a Comment