লাইন

লাইন

--------

- কুমুদ ঘোষ

-----------------

[১]

আজিকালি সকলো বস্তু লাইনত থাকিলেহে পোৱা যায়

লাইনৰ বাহিৰ মানে দেশৰ বাহিৰ -

বন্ধু এজনে ফোনত মোক এই পৰামৰ্শ দিলে ।

স্কুল-কলেজত নামভৰ্তিৰ বাবে লাইন

ৰেচনৰ দোকানত চাউলৰ বাবে লাইন

চিনেমা হলত টিকটৰ বাবে লাইন

চিকিৎসালয়ত চিকিৎসাৰ বাবে লাইন

জীয়াই থকাৰ বাবে জীৱনত

কতবাৰ কতৰকমে লাইন পাতোঁ আমি ।

লাইনত থকা সকলোৱে বিচৰা সকলো বস্তু বিচাৰিলেই নাপায়

কেতিয়াবা আধাতে বন্ধ হয় দুৱাৰ-খিৰিকি

খালি হাতে উলটি যাব লগা হয় অহাবাটে ।

লাইন মানে নিশ্চিন্ত, নিশ্ছিদ্ৰ নহয়

লাইন মানে সফলতা নহয়

লাইন মানে পোহৰ নহয় ।

[২]

ওচৰা-উচৰিকৈ দুডাল চিৰি

কেতিয়াও একেলগ নোহোৱা দুটা স্বতন্ত্ৰ সত্তা

আমি নাম থ'লোঁ - ৰেল লাইন ।

ৰেল লাইনক সাক্ষী কৰি ঘৰমুৱা হৈছিল

এজাক ভোকাতুৰ মানুহ,

তেওঁলোক লাইনতে আছিল

জীয়াই থকাৰ টিকট একোটা বিচাৰি

ৰেললাইনতে ক্লান্ত, অৱশ হৈ শুই পৰিছিল ।

মৃত্যু ভয়ত কাতৰ নোহোৱা এক টোপনিক সাক্ষী কৰি

শুই আছিল তেওঁলোক,

পেটত কি আছিল বা নাছিল

কোনেৱেই কৰা নাই সেই প্ৰশ্ন ।

অ'ত-ত'ত ছিটিকি থকা মঙহ আৰু ৰুটি দেখি

কোনোৱে কোনোৱে কৰিছিল প্ৰশ্ন

কিয় শুইছিল বাৰু ৰেল লাইনত ?

আপোনাকক প্ৰশ্ন এটা সুধিব বিচাৰিছোঁ -

কওকচোন বাৰু,

কোনটো লাইনত থাকিলে

পাব পাৰি দুবেলা দুমুঠি ভাত

লাজ ঢাকিবলৈ এডোখৰ বস্ত্ৰ

আৰু নিৰ্বিঘ্নে যাপন কৰিব পাৰি জীৱন ? ■