আমেৰিকা নে চীন ?
---------------------------
- কুমুদ ঘোষ
--------------------------
আমেৰিকা নে চীন ?
চীন নে আমেৰিকা ?
কথাবোৰ থাকক এতিয়া ।
জীয়াই থাকিলে সুধিম এদিন
আচলতে কোন কেনেকুৱা ?
কালি ৰাতি সপোনত ড'নাল্ড ট্ৰাম্প আহিছিল
আৰু আহিছিল জি জিনপিং
মোৰ সমুখত দুয়ো কৰমৰ্দন কৰিছিল,
নিৰ্দিষ্ট দূৰত্বৰ পৰা মই কথা-বতৰাবোৰ শুনি আছিলোঁ ।
লোকৰ মুখত শুনিছোঁ
আমেৰিকা !
আনৰ স্বাধীনতাত সতকাই হস্তক্ষেপ কৰা তোমাৰ স্বভাৱ ?
লোকৰ মুখত শুনিছোঁ
চীন !
ভালৰ ভালখিনি নিজৰ বাবে থৈ, সস্তিয়া বস্তুৰে বজাৰ দখল কৰা তোমাৰ অভ্যাস ?
কোৱাচোন কোৱা
আমেৰিকা আৰু চীন
তোমালোকক আমি কিয় নকৰিমনো ঘিণ ?
তোমালোকৰ তাত কিবা এটা হ'লে
আমাৰ ইয়াত আৰম্ভ হয় ধৰ্মৰ টুৱেণ্টি টুৱেণ্টি মেছ ।
তোমালোকৰ তাত কিবা এটা হ'লে
আমাৰ ইয়াত পানীৰ দৰত বিক্ৰী হয় মানুহৰ প্ৰতিটো দিন ।
আমেৰিকা নে চীন ?
চীন নে আমেৰিকা ?
থাকক কথাবোৰ এতিয়া ।
সন্দেহ কৰা ভাল,
সন্দেহ নকৰিল কেনেকৈ গ'ম পাম
আমেৰিকা নে চীন ?
No comments:
Post a Comment