দুটা টাবৰ দুপাহ সৰুফুল
----------
কুমুদ ঘোষ
-----------------
ফ্লেটৰ পঞ্চম মহলাৰ এচুকৰ এটা টাবত ফুলি আছিল
এপাহ সৰুফুল।
মাটিৰ সৈতে সম্পর্ক নথকা ফুলজোপাই
মূৰ নদঙাকৈ ফ্লেটৰ নাতিদূৰৈত থকা আমজোপালৈ চাই চাই
প্ৰায়ে কৈছিল -
'এইজোপা ইমান সৰু, কোনোকালে মোক দেখা নাপাব!'
এদিন আমজোপা কটা গ'ল,
লহপহকৈ বাঢ়ি আহিল আন এটা ফ্লেট।
সেই ফ্লেটৰ পঞ্চম মহলাৰ এচুকৰ আন এটা টাবৰ এপাহ সৰুফুলে
সিটো ফ্লেটৰ সিপাহ ফুলক প্ৰেম নিৱেদন কৰিলে।
ফ্লেটৰ কাষৰ এচুকত আমজোপাৰ মূঢ়াটো
ৰ'দ-বৰষুণত তিতি থাকিল।
দুটা ফ্লেটৰ দুপাহ ফুলৰ
প্ৰেম নিৱেদন চাই চাই
আমজোপাৰ মূঢ়াটোৱে
মুখৰ ভিতৰতে বিৰবিৰালে -
'মাটিৰ সৈতে সম্পর্ক নথকা প্ৰেম,
মাটিৰ সৈতে সম্পর্ক নথকা মানুহ একে।
দুয়ো টাবতে বাঢ়িব টাবতে মৰহিব।' ∆ ∆ ∆
